عقوق الوالدين

عقوق الوالدين

عقوق الوالدين

الموضوع ده فكرت اكتبه بعد ما قريت كتيييييييير اوى عن عقوق الابناء وتيجى الام يعينى تعيط وتقول ابنى حبيبي شتمنى وبنتى حبيبتى زعقت في وشي وحجات من دى كتيييييير والام تقول ده انا عمرى ما حرمتهم من حاجه .. ده كل اللي نفسهم فيه كنت بجبهلهم .. ده انا كنت بأكل واشرب واغير واسهر الليالي على تعبهم ليه بس كده يا ابنى
والاب بقي يقووووول دى اخرتها ابنى رمينى ده انا ياما اشتغلت وسهرت الليالي علشان اوفر ليهم القرش اخص عليهم

طب ما الام عملت كل حاجه صح اهو ليه بقي طلع الابن عاق ..والاب كمان اشتغل علشان يجيب كل طلباتهم وكله تمام اهو وتحت السيطره اممم كل حاجه صح هى دى وظيفه الام الام اكل وشرب وسهر امال ايه حكايه الام مدرسه دى ودى بس وظيفه الاب امال بيتقال عليه رب البيت ازاى

اعدت كده فكرت مع نفسي طب ما انا زى كل الامهات دى جيت كده في وقت بنتى بتصالحنى علشان كنت مخصماها هى 5 سنين علشان كذبت وتقلي صالحينى بقي يا ماما انا بحبك لقيت نفسي بقلها ليه بتحبينى لقيت الرد صدمنى قلتلي علشان بتاكلينى وتشربينى وتسرحينى بس كده
طب ما الحجات دى كلها ممكن جدا تعملها مربيه اطفال وخلاص سعتها عرفت بس ليه دايما العقوق بيبقي في سن المراهقه عمركم شفتم طفل عاق

طب اشمعنى المراهقه فيما فوق بيبقي فيها عقوق علشان سيادتك دورك خلص والبنت والولد بقي عندهم القدره انهم يعتمدوا على نفسهم في اكل وشرب وغيره وغيره فمبقاش في احتياج لحضرتك ولا كمان للاب ما بيبقي جواهم قناعه انهم ممكن يشتغلوا ويوفروا لنفسهم فلوس عادى يعنى

سعتها متلميش ابنك لان انتى لخصتى دورك طول عمره انك بتاعت الاكل والشرب والحموم والتسريح وخلاص على كده وبتبقي فاهمه انتى وجوزك ان كله تمام وتحت السيطره

طيب نعمل ايه بقي تعالوا نلحق ولادنا ونفسنا من الاول كده

اول حاجه كده بلاش التفرقه بين البنت والولد بلاش تقولى لابنك سيب هدومك انا هكويها اصل انت راجل

سيبي ابنك يكوى هدومه ويرتب سريره ويغسل الطبق اللي اكل فيه ونفس القصه للبنت

علميهم الحنيه طب ازاى لما تبقي تعبانه قولى لابنك هاتلى اشرب او تعالى يا بنتى اقريلي قران على راسي والكلام
ده ممكن تعلميه ليهم من سن 3 سنين وخليهم يعتمدوا على نفسهم في حجات كتير يعنى مثلا ياكلوا لوحدهم دول بيوقعوا ويبهدلوا الدنيا ومالوا افرشي حاجه على السجاجيد ومره في مره هيتعلموا

وانتى مشيا معاهم في الشارع ادى لابنك جنيه وقليلوا لما تلاقي حد غلبان وضعيف اديهولوا

بنتى لما نبقي في الشارع تعد تجرى يعينى ورا القطه لحد ما تقطع نفسها

لحد ما صعبت عليا قطط الشارع الصراحه رحت قلتلها حرام ربنا كده يزعل منك متخوفيهاش وحكيت ليها قصه الست اللي ربنا دخلها النار علشان حبست قطه كده اتعلمت ازاى تبقي رحيمه بالحيوان كمان

علمى ابنك الصراحه وعرفيه ان الصراحه بتنجى يعنى لو كسر حاجه وجه قالك اياكى تعاقبيه متجيش بقي سيادتك تقليلوا قولى الصراحه واول ما يقلك اه يا ماما انا اللى كسرتها تجري علي الشبشب وتقليلوا تعالى هنا يا ابن التييت
التزمى بوعدك معاه واعرفي ان ابنك بيقلدك لو كنتى صريحه هيبقي هو كمان صريح
احكلكم موقف حصلي امبارح واحرجنى جدا ادام بنتى كنت اعده بروق بنتى جت تقلي الحقي يا ماما اخويا عايز يمسك حاجه ازاز وطبعا ابنى عمال يصرؤخ علشان الهانم جت قالتلى قلتلها مش انا قلتلك لما يعمل حاجه غلط لهيه قليلوا مثلا روح كلم ماما او بص اللعبه دى اى حاجه المهم سكتت ومكنتش اعرف انها شيلهالي اللئيمه
جينا بليل لقيتها بتقله واحنا في المطبخ روح كلم بابا قلتلها انتى بتكدبي ليه قلتلى بلهيه قلتلها بردو متكدبيش عايزاكم بقي تتوقعوا ردها اه اه هو ده قالتلى ما انتى الصبح قلتيلي اقله روح كلم ماما علشان الهيه كدب بردو ولا ايه

المهم الخلاصه علشان مبقاش طولت عليكم وتزهقوا منى

بلاش تبقي مربيه وبس لاولادك ولا الاب يبقي مجرد بنك متحرك

علمى ابنك الاخلاق في مواقف في قصص علميه الصدق والحياء واحترام الكبير والحنيه ومساعده الصغير والمحتاج

علميه ان الرجوله مش انك تعد تانتخ وامك تعبانه في السرير ومش انك علشان تحسي انك كبرتى تعلى صوتك على امك

اوعى تقولى ده لسه صغير كل ما كان ابنك صغير كل ما كان هتبقي استجابته اسرع واحسن كل ما تتاخرى في تعليمه كل ماهتتعبي وسعتها متلوميش غير نفسك

انا مش عايزه تقييم ولا حاجه كل اللى طلباه دعوه حلوه ليا ولاولادى وهيبقي لكم مثلها